Tragjedi në Ferizaj – Punëtori 43-vjeçar humb jetën pas rënies nga lartësia

Një aksident tragjik ka ndodhur sot në rrugën Ferizaj – Prishtinë, ku një punëtor ka ndërruar jetë pasi ka rënë nga një objekt ku po punonte. Lajmin e ka konfirmuar zëdhënësja e Policisë për rajonin e Prishtinës, Flora Ahmeti.

Sipas informacionit të policisë, rreth orës 15:00, u raportua se viktima, një mashkull 43-vjeçar, ra nga një lartësi gjatë kryerjes së detyrave të tij profesionale. Për shkak të plagëve të marra, ai nuk ka mundur t’i mbijetojë dhe vdekjen e ka konstatuar ekipi mjekësor në vendngjarje.

Policia ka nisur hetimet në bashkëpunim me Prokurorinë dhe Inspektoriatin e Punës, për të sqaruar rrethanat e sakta të ngjarjes dhe për të përcaktuar shkaqet që çuan në këtë aksident fatal.

Flora Ahmeti theksoi se hetimet po vazhdojnë dhe do të nxirren konkluzione pas përfundimit të tyre.