Ngjarja e rëndë, e cila ka shokuar opinionin publik, ka marrë fund me vendimin për burgim të përjetshëm për të dy prindërit, pasi u provua se ata kishin lënë djalin 3-vjeçar të vdiste nga uria dhe etja.

Vogëlushi ndërroi jetë në maj të vitit 2024, pas një kalvari të gjatë vuajtjesh.

Ekspertiza mjeko-ligjore zbuloi se në momentin e vdekjes, Elias peshonte vetëm 7 kilogramë, një peshë drastikisht nën mesataren për moshën e tij. Shkaku i vdekjes u përcaktua si pasojë e kequshqyerjes dhe dehidratimit të rëndë.

Gjykata dëgjoi se prindërit, pavarësisht përkeqësimit të dukshëm të gjendjes së fëmijës, nuk kërkuan asnjëherë ndihmë mjekësore. Përkundrazi, hetimet zbuluan se ai ishte izoluar nga pjesa tjetër e familjes dhe mbahej në kushte çnjerëzore.

Sipas prokurorëve, motivi pas këtij krimi monstruoz lidhej me bindjet e çmendura të prindërve. Çifti thuhet se jetonte në një “botë fantazie mistike” dhe pretendonte se djali i tyre ishte “i pushtuar nga një demon”.

Një ekspert i shëndetit mendor dëshmoi në gjyq se Kevin dhe Nathalie M. shfaqnin çrregullime të theksuara personaliteti me tipare sadiste.

Pozita e tyre u rëndua edhe më shumë nga zbulimi i komunikimeve dhe materialeve të tjera që dokumentonin abuzimin sistematik ndaj të miturit.

Një fakt tjetër rrëqethës që doli nga hetimet ishte se tre motrat e Elias ishin trajtuar normalisht nga prindërit, duke e bërë torturën ndaj djalit edhe më selektive dhe mizore. Pas arrestimit të prindërve, vajzat janë vendosur nën kujdesin e familjeve kujdestare.