Pogradec – Një nga ngjarjet më të rënda dhe më makabre që ka përfshirë opinionin publik shqiptar muajt e fundit ka marrë tashmë një kthesë zyrtare dhe të pakthyeshme. Pas javësh pritjeje dhe ankthi, analizat e ADN-së kanë folur, duke nxjerrë në dritë një të vërtetë sa të dhimbshme, aq edhe irrituese për çdo qytetar.
Burime pranë grupit hetimor bëjnë me dije se analiza e ADN-së ka përputhur materialin gjenetik të fetusit me atë të të dyshuarit, një 67 vjeçar i identifikuar si Rrushan Selko me njohje familjare me familjen e vajzës.
Sipas informacioneve, e mitura ka dëshmuar në prani të psikologut, duke treguar për kërcënimet e vazhdueshme që i janë bërë për të mos e bërë publike ngjarjen. Ndërkohë, familjarët janë marrë disa herë në pyetje, ndërsa hetuesit po punojnë për të dokumentuar çdo detaj të rastit, raporton korrespondentja e Top Channel Dhorjela Çule.
Autoritetet kanë theksuar se rasti po trajtohet me prioritet maksimal, si për zbardhjen e plotë të ngjarjes, ashtu edhe për garantimin e mbështetjes mjekësore dhe psikologjike për të miturën. Ngjarja e rëndë u zbulua në Pogradec dhe u bë publike në media në 30 dhjetor.
Hetimet kanë nisur menjëherë pas konfirmimit të shtatzënisë së të miturës, e cila në atë kohë rezultoi rreth 22 javëshe.
Top Channel
Pas gati dy muajsh hetime intensive dhe pritjeje për rezultatet e autopsisë së kryer mbi foshnjën 4-muajshe (fetusin), analizat laboratorike kanë konfirmuar atë që dyshohej: Fëmija i përkiste 67-vjeçarit Rushan Selko. Ky rezultat shkencor tashmë është pjesë e fashikullit hetimor të Prokurorisë së Korçës. Burime për mediat bëjnë me dije se ky provë konsiderohet si “kyçi” që mbyll rrethin e hetimeve, duke mos i lënë asnjë hapësirë manovrimi të moshuarit për të mohuar krimin e rëndë.
Kronologjia e një Horrori: Kërcënimet me jetë ndaj të miturës
Ngjarja, e cila doli në dritë në dhjetor të vitit të kaluar, zbuloi një realitet të tmerrshëm brenda komunitetit. Një vajzë vetëm 12-vjeçare, ende fëmijë, u gjend përballë një makthi që asnjë i rritur s’do mund ta imagjinonte.
Shtatzënia e padëshiruar: E mitura ishte në muajin e katërt të shtatzënisë kur gjendja e saj u zbulua.
Terrori psikologjik: Arsyeja pse vajza heshti për muaj me radhë ishte frika e skajshme. Sipas dëshmive, Rushan Selko e kishte kërcënuar vazhdimisht se do ta vriste nëse ajo guxonte t’u tregonte prindërve apo dikujt tjetër.
Me marrjen e rezultateve të ADN-së, Prokuroria e Korçës është në hapat e fundit. Dosja pritet të dërgohet brenda pak ditësh në gjykatë me kërkesën për përfundimin e hetimeve dhe nisjen e gjykimit.
“Analizat i janë bashkëngjitur tashmë dosjes dhe pozita juridike e të arrestuarit është rënduar ndjeshëm,” raportojnë burimet pranë organit të akuzës.
Ky rast ka rindezur debatin e ashpër mbi sigurinë e fëmijëve dhe dënimet që meritojnë abuzuesit e të miturve në Shqipëri. Ndërsa 67-vjeçari pret dënimin prapa hekurave, trauma e 12-vjeçares mbetet një plagë e hapur që kërkon kohë dhe mbështetje për t’u shëruar.